اصنع بنفسك : كيفية عمل رفوف سلم لعرض الخرز

واحد برضو من المشروعات بتاعة اصنع بنفسك اللي عملتها هو الرفوف الصغيرة اللي عاملة زي السلم دي جميلة اوي لعرض الخرز الصغير بتاعي  كان سهل جدا و عملته ببلاش انا بحب الرفوف السلم عشان بتقدري تشوفي كل حاجة من خلالها و كمان تقدري تجيبي اللي انتي عايزاه من فوق من غير ما تشيلي الحاجات اللي تحت هوريكو عملتها ازاي.. عملت اللي اقدر عليه عشان ارسمهالكو يارب تكون مفيدة ممكن تعمليها للمونيكيرات او ادوات المكياج

هتحتاجي :

 1- كرتون

2 - سكينة تقطيع او كتر و لوحة تقطيع

3 - مسدس شمع 

4 - ورق تغليف ابيض بيلمع 

الطريقة :

خلينا نتخيل ان طول الرف  بتاع المكتبة او التسريحة اللي هتحطي عليه المجسم كله عبارة عن "x" .. هتقيسي بقى طول البرطمانات او ازايز المونوكير و ليكن "N" يبقى "x" ناقص طول ازايز المونوكير ناقص خمسة سنتي للحركة يبقى كدة طول الرفوف اللي عايزة تعمليها و ليكن "F"

بعد كدة هتشوفي عايزة تعملي كام رف انا عاملة تلاتة غير اني عايزة كمان احط برطمانات قدام المجسم نفسه كانه رف زيادة فهتقسمي عمق الرف على اربعة اوعدك انك هتفهمي لو بصيتي للرسمة الجية 

بعد كدة هتقطعي الكرتون و تجمعي الحتت زي ما هو موضح في الشكل اللي فات اسفل يسار الصورة المربع الرمادي ده هو الرف اللي انتي هتحطي عليه المجسم سواء مكتبة او دولاب او تسريحة خدي بالك اني حطيت برطمانات بعد المجسم تحت خالص ع الارضية بتاعة المكتبة او التسريحة يعني عندي اربع رفوف و مقاس الرف  الصغير هيبقى مقاس التسريحة تقسيم اربعة يطلعلك مقاس الحتت البمبي ده لو عايزة تعملي المجسم بعمق التسريحة كلها 

بعد كدة هتغلفي المجسم كله بالورق اللي بيلمع الابيض و ده متوفر ف المكتبات كورق طباعة بس انا بحبه لان الحاجات مش بتتزحلق عليه بسهولة

مش متخيلين انا حابة البروجيكت ده اد ايه فعلا فرق معايا و لم الدنيا .. اتمنى اكون قدرت اوصلكوا الفكرة و يكون الشرح كويس .. اصلي فاشلة ف شرح الرياضة  لو انبسطتي من الفكرة دي ليكي مفاجأة كبيرة في الرفوف دي هنا

اشوف فين ردودكوا و اسئلتكوا و تعليقاتكوا ممكن تعلقي بدون ما تسجلي اي اسم اختاري بدون اسم و علقي مستنياكوا .. اشوفكوا البوست الجي على خير