اعادة استخدام : كلبسات الملابس لغلق الاكياس الصغيرة

بجد بيعصبني اوي كيس الفيجيتار لما يتدلق ف كل مكان .. بيتبقى منه حبة صغيرين و مش بعرف اقفله باي طريقة .. من كام يوم كان عندي شراب جديد و الشرابات بيكون فيها دبابيس كدة صغيرة بتلم الشرابات مع بعضها انا فكرت ارجع استخدمها تاني في اني اقفل بيها اكياس التوابل الصغيرة 

انا متاكدة ان كلنا بيكون عندنا حاجة مشابهة ف البيت اتمنى يكون البوست المرة دي خفيف و مقرمش و سهل .. عايزة اشوف تعليقاتكوا و اراءكوا و اكيد الفايز في التطبيقات بتاعة الترتيب هيتحط ف ركن القراء اشوفكوا البوست الجي 

اعادة استخدام : صبانة الورق لحفظ واقية الاكواب

بوست كدة في السريع كنت عايزة اشاركم معايا فيه .. عارفين واقية الاكواب المربعة اللي موجودة في كل حتة في البيت ؟؟ .. بناخدها من محل او صيدلية او اي مكان بندخله او بيوزعوه ف الشغل او في المناسبات تلاقي مرسوم عليها رمضانيات و حاجات ... هي شكلها مربع و اد الستيكي نوتس بالضبط ففكرت في الصبانة بتاعة الورق او الاستيكي نوتس عشان احفظ فيها الواقيات دي ... و بصراحة كانت فكرة جامدة جدا حطيتها بقى في كل مكان ع السفرة و جمب التلفزيون و كدة 

للمرة المش عارفة كام .. رخيصة سهلة عبقرية ببلاش عايزة اشوف تعليقاتكوا و تفاعكلوا و اراءكوا ممكن تعلقي بدون ما تسجلي اي دخول اختاري بدون اسم و علقي .. اشوفكوا البوست الجااااااااي

اعادة استخدام : منظم للريموت كنترول في غرفة المعيشة

بجد حاجة جميلة اوي انك تفكري في حاجة عندك تستخدميها اكتر من استخدام عشان تناسب احتياجاتك بالضبط البتاعة الخشب دي كانت منظم للمكتب زي ما انتوا شايفين انا بقى خدتها و عملتها منظم للريموت كنترول بتاع التليفزيون شفتوا الفكاكيييه ؟ بجد جميلة جدا و عملية و مناسبة جدا للحاجات اللي جمبها علبة المناديل و الطفاية .. بستخدم الطفاية دي للفتافيت الصغيرة اللي بلاقيها ف الارض اصل عندي نسنوس صغير ف البيت .. محدش عندنا بيدخن بس اهي للضيوف ؟؟ لازم اعترف كمان ان انا عندي اكتر طفاية كيوت ف الدنيا

فعلا مبسوطة بيها جدا شكلها الخشبي شيك اوي و شايلة كل الروموتات و الجايد بتاع التلفزيون صورة عرضية مقطعية لقطاع عرضي :) :) نبص تاني كدة

اللي عاوزة اقوله انه الواحد لو فكر برة الصندوق زي ما بيقولوا ممكن تعيدي استخدام حاجات مش محتاجاها في حاجة تانية محتاجاها فكري الحاجة دي ممكن احط فيها حاجة شكلها ايه و ينفع احطها فين و تكفي ايه احطه فيها بدل ما تروحي السوبر ماركت و تشتري سلة او صندوق غاليين دوري عندك في البيت ممكن تلاقي استعمالات تانية للحاجات اللي عندك في البيت من الاول بلاش تتسرعي و تجيبي حاجة غالية و الحاجة اللي عندك في البيت مش لاقية حاجة تعملها

ان شاء الله هعمل بوست عن ازاي تخلي دايما الليفنج روم بتاعتك نضيفة مهما كنتي مشغولة لو لقيتي الموضوع ده مفيد بالنسبة لك ممكن تكتبي كومنت او  تبعتيلي عن اي حاجة استخدمتيها في حاجة تانية مستنية ردودكو و فيديوهاتكو و اي سؤال انا موجودة ممكن تعملي كومنت من غير ما تسجلي دخول اختاري تعليق بدون اسم و علقي اشوفكوا البوست الجاي