ليه لازم نبقى منظمين

 فيه سؤال كدة  بلاقي ناس بتساله بتقولك و انا ليه ابقى منظمة ياختي بلا ترتيب بلا تنظيم بلا خيييييييييييبة هو شغل البيت بيخلص؟ دحنا لو فتحنا ف شغل البيت هنفتح على نفسنا فاتوحة مبتتقفلش .. بصراحة هقولك معاكي حق ان الشغل مبيخلصش لكن لو فيه نظام هيخلص .. لو كل حاجة في مكانها و مرتبة و عارفة نظامها ماشي ازاي هتنتهي بسهولة بدون وجع دماغ او تلفان اعصاب 

انا ممكن ارد على سؤالك بالعكس هو ايه اللي هيحصل لو مكناش مرتبين او منظمين

مشكلات حقيقية

تخيلي لو قمتي الصبح تروحي الشغل و مش لاقية مفتاحك او ابنك رايح المدرسة مش لاقي شرابه او بنتك عندها درس ومش لاقية توكها بعد طبعا ما تزعقي و تحبطي و تطلع زرابينك كلها هتتاخري على الشغل و تسمعي كلمتين ملهمش اي لازمة من مديرك 

ضياع للفلوس

تخيلي لو عمالة تدوري على خرامة الورق اللي جبتيها من كام شهر ف درج المكتب اللي هو عبارة عن حفرة سودة مش شايفة فيها حاجة و لا عارفة تلاقي فيها حاجة .. و عمالة تدوري متلاقيش و تيأسي و تروحي تجيبي غيرها .. طبعا بعد ما تجيبي غيرها بتلاقي الاولانية و ده بيبقى اسمه مضيعة للفلوس 

مشكلة في العلاقات

لو عندك معاد مع حد او ميتنج و حطاه ف دماغك .. ممكن دماغك تقدر تشيله يوم يومين تلاتة عشرة لكن مش اكتر من كدة .. طبعا لاننا مش منظمين هننسى نكتبه و خدي بقى على كدة في كللللل المناسبات و الاعياد و المناسبات الهامة و المقابلات دي فعلا ممكن تسبب مشاكل في العلاقات

الاحباط و الكسل

بجد مفيش حاجة ممكن تكون مزعجة اكتر من اني امشي في قوضة مليانة كراكيب ملهاش لا معنى و لا لازمة تعرفي ان الحاجات دي بتعمل طاقة سلبية كبيرة للبني ادم ... العاب العيال في كل حتة .. الغسيل مكوم برة سبت الغسيل .. هدوم مش عارفة نضيفة و لا عايزة تتغسل .. فعلا مستحيل الواحد يقوم يعمل حاجة .. و هتفضّلي انك متقوميش من ع السرير اصلا

كل اللي فات ميجيش نقطة في بحر المشاكل اللي ممكن تنتج من كونا مش منظمين فعلا الكركبة تعتبر خطر لو سبناها تكبر و تولد هتأثر بشكل سلبي و فظيع على حياتنا في حين انك لو منظمة الدنيا هتبقى فل و هتلاقي حاجتك بسهولة بدون مشاكل .. ممكن التنظيم يأثر على حياتنا بشكل ايجابي رائع خصوصا ف وقت الازمات .. لو مش عارفة تبدئي ازاي او منين ارجعي للصفحة فوق كيف أبدأ

اتمنى يكون فعلا الموضوع فادك و عجبك مستنية ردودكو و اراءكو و اقتراحاتكو اشوفكو البوست الجاي