ازاي ابدأ تنظيم

انا عارفة ان اغلبنا بيشوف صور النت عن الترتيب و التنظيم و الافكار المبتكرة عن الترتيب و بنبقى عايزين نعيط :( و نرجع عايزين نضرب قوضتنا قلمين و كارهين العيشة و مش راضيين و لا مبسوطين من البيت المبهدل و البيئة الغير صحية بالمرة اللي احنا قاعدين فيها و بصراحة و بساطة شديدة عايزة اطمنكو ان الترتيب اللي اتعلمناه في بيت ماما و بابا ده مش ترتيب  عايزة تعرفي ليه ؟ ده موضوع يطول شرحه بس باختصار الترتيب و التنظيم له اصول و فن عشان كدة بتلاقي صور الترتيب على الانترنت حاجة و احنا عايشين ف كوكب تاني خالص 

 ببساطة شديدة كل الخبرا بيدونا نصيحة حلوة جدا و هي انه مش مهم تبدئي منين و لا ازاي .. المهم فعلا انك تحطي رجلك على اول الطريق .. لما تبدئي في حاجة هتحسي بالطاقة اللي تخليكي تكملي .. المهم انك تبدئي و خلاص ابدئي باي طريقة غرفة غرفة او دولاب دولاب او درج درج المهم انك تبدئي ممكن برضو تقسمي الهدوم ف اسبوع الورق و المجلات و الكتب في اسبوع .. ادوات العدة في اسبوع و هكذا بس هديكي شوية خطوات تعمليها سواء هتبدئي بمكان او دولاب او درج او اي مساحط وقعت تحت اختيارك

1 - فضي المساحة

لو هتبدئي مثلا بدرف المطبخ او درج التسريحة انصحك اول حاجة تعمليها انك تفضي كلللللله يا معلم .. شيلي كل حاجة و فضيها برة  عارفة ليه ؟ عشان تشوفي مساحتك شكلها ايه و مسافاتها و ابعادها ايه و تقدري تعرفي انتي هتحطي فيها ايه و الكمية اد ايه .. يعني ملقاش حاطة تيشيرتات زوجك في درج و انتي شايفة التشيرتات كتير جدا و مش هتكفي لكن لو كنتي فضيتي مساحة الدرج  هتقدري ببساطة تعرفي انه مش هيكفي

2 - قيسي المساحة بالسنتي

 قبل ما تروحي تشتري منظم ادراج او  علب عشان تنظمي لازم تكوني عارفة كويس المساحة اللي هتحطي فيها  الكلام ده قبل ما تشتريه عشان ببساطة شديدة متخسريش وقت و فلوس و مجهود ع الفاضي  و ياريت اصلا قبل ما تشتري تخدي جولة سياحية في البيت لان كتير اوي ممكن تستخدمي ادواتك و حاجاتك الموجودة ف البيت من غير ما تروحي تتكلفي ..ممكن تلاقي حاجات مش متخيلة انتي ممكن تستخدميها فايه لو فكرتي برة الصندوق زي ما بيقولوا هتلاقيلها ميت استخدام و استخدام .. هنخش ف الحوار ده بالتفضيل مرة تانية

3 - خلي عندك منطق ف الترتيب

بصراحة دي اهم خطوة لان كتير مننا بننساها .. يعني عندك فاتورة السوبر ماركت ف درج الاقلام  و لا رخصة السواقة ف درج التسريحة  و  احلى حاجة بقى تفتحي دولابك تلاقي شهادة ميلادك تحت الهدوم ...وهو ده الغلط اللي كلنا بنقع فيه احنا مش بنرتب بس عشان شكل الحاجة تبقى حلوة لكن كمان عشان نقدر نلاقي حاجتنا بسهولة .فلو سمحتي شييييييلي اي حاجة ملهاش مكان في الدرج ده ملهاش علاقة بيه.. ارجوكي

4 - اعملي ديزاين للسيستم بتاعك

يعني مثلا انتي دلوقتي فضيتي المساحة و عايزة تحطي مثلا ادوات المكتب ف الدرج ده ..اهم حاجة انك لازم لازم تسيبي ع الاقل 15% مساحة فاضية للسيسيتم اللي هتحطيه عشان لو جبتي تيشيرت جديد او مجموعة اقلام جديدة لازم يلاقوا مكان يا اما تعملي سيستم لو حاجة جديدة دخلت لازم حاجة قديمة تطلع .. مش عايزة الاقي حاجة مكدسة مش عارفين نفتح منها الدرج او الدرفة نفتحها  نلاقي جبل كراكيب وقع فوق دماغنا و نرجع نصوت و نزعق للعيال ممكن بقى تنزلي تشتري السيستم اللي اخترتيه سواء منظم او مقسم او بوكسات او سلات و انتي مطمنة

5 - رتبي بقى

  خلاص عملتي الخطوات اللي فاتت كلها بالضبط و بالترتيب ؟ مفاضلش غير انك تحطي الحاجة بالترتيب اللي صممتيه ف الخطوة اللي فاتت بس متنسيش قبل ما تعملي كدة تقسمي الحاجات اللي هتحطيها اقسام يعني الاقلام لوحدها ..  الاساتيك لوحدها.. الدبابيس لوحدها .. او تيشترتات صفرا لوحدها .. تشيرتات سودا لوحدها و هكذا ....  عايزين سيستم نمشي عليه .. هنجيب مثلا منظم بطول الدرج و نقصه و نعمل سيستم بقى اللي يخلص كتابة يحط الاقلام ف المكان ده او سيستم مثلا التيشرت الاصفر يطلع من الغسالة ع المنشر يطبق بالطريقة دي و يتحط جمب التيشيرتات الصفر او سيستم مثلا الفواتير بتاعة الشهر ده في الظرف ده واول ما الشهر يخلص بتتشال و تتحط ف الفولدر ده مع فواتير السنة او تترمي او ايا كان ... اخلقييييييي سيستم و الا كل مجهودك هيضيع

طبعا الخطوات دي تمشي على اي مساحة درفة درج غرفة .. اي حاجة .. ممكن بقى دلوقتي تبدئي باي حاجة ممكن تبدئي بانك تلمي اي خمس حاجات مش محتاجاها و تتبرعي بيها او ترميها ممكن تبدئي انك تلمي خمس حاجات قدامك مش ف مكانها و ترجعيها مكانها و هكذا 

اتمنى فعلا اني اكون افدتكو بحاجة لو عايزة تكتبي موضوع عن النظام و الترتيب او تبعتيلي صور لمشروع ترتيب  انتي عملتيه هينزل هنا ف البلوج ابعتلي ع الايميل او لو عايزة تعلقي هنا ممكن تعلقي بدون اسم مش لازم تسجلي دخول ولا حاجة اختاري بدون اسم و علقي .. مستنية تعليقاتكم و ردودكو اشوفكوا البوست الجاي