كيفية ترتيب الحلل و الطاسات

كنت في نص الليل وقتها و ابني نايم قلت استغل الوقت في حاجة مفيدة و اقوم ارتب الحلل و الطاسات  بصراحة انا كنت كارهة الدرفة بتاعة الطاسات و الحلل لانها كانت على طول مكعبلة و مضطرة اشيل حاجات تقيلة عشان اجيب الحلة اللي عايزاها لكن بعد ما رتبتها عمالة افتح و اقفل فيها كل شوية  كان ابني نايم انتوا متخيلين صعوبة اني اخبط في الحلل و هو نايم حتى ولو  على بعد ميل ؟؟ عموما كانت الدنيا ليل فمعلش بقى الاضاءة مش حلوة اوي

دي كانت درفة الحلل و الصواني قبل الترتيب مكنتش بعرف اجيب منها حاجة كان لازم اشيل حاجات تقيلة قبل ما اوصل للي انا عايزاه بغطا مجهول معرفش بتاع انهو حلة .. فوق كدة كمان عندي مش عارف كم ميت حلة مبستخدمهمش اصلا و زاحمين المكان ع الفاضي .. لو تشوفوا مطبخي اصلا اد النتفة بالضبط فمش مستحمل حاجة .. كويس ان فيه درفة للحلل اصلا .. كنتيجة لكدة حطيت كل الحلل اليومية اللي بستخدمها كل كل يوم في مكان لوحده منفصل عن الدرفة دي هتكلم عنه ف بوست منفصل

حطي ورق لاصق بدل من المفارش البلاستك

انا عن نفسي استخدمت الجلاد الشفاف بدل ما حط مفارش بلاستك لانه بصراحة سهل التنضيف و شكله كويس و مش كل شوية اجي اشيل حاجة الاقي المفرش اتشال ولا اتكعبر تحت الحلة بجد دي كانت حاجة من الحاجات اللي بتنرفزني جدا جدا  و بصراحة بيدي لمعة كدة و لو حطيت اي باسكت و لا حاجة بتتزحلق بسهولة و اقدر اجرها بسهولة و اخد اللي عايزاه من جواها طبعا شايفين الفرق بين الدرفة اللي فوق محطوطلها الجلاد و اللي تحت لأ

خلي اللي مش بتستخدميه بعيد

قعدت شفت ايه الحلل اللي مبستخدمهاش او بستخدمها قليل اوي لما يكون عندي وليمة او عزومة كبيرة مثلا و حطيتهم كلهم كدة فوق بعض بعيد على جنب  ف ركن كدة عندك في الغالب بيكونوا اكبر حلة ف كل طقم حلل عندك .... برضو كان عندي حلة تيفال عشان مخليهاش تتخدش حطيت فيها ورق مناديل ممكن كمان تستخدمي اكياس بلاستك او اطباق ورق او حتى ورق عادي المهم تحميها من الخدوش

رتبي حسب درجة الاستخدام

رتبي حسب درجة استخدامك للحاجة انا رتبت من اللي مستخدموش خالص لحد اللي بستخدمه بشكل يومي .. رتبتهم بحيث اقدر اخد اللي انا عايزة بخطوة او خطوتين بالكتير و من غير ما اشيل اي حاجة تقيلة و ف نفس الوقت حطيت الطاسات و الحلل بشكل 

عامودي عشان اوفر مساحة .. تقدري تشوفي دلوقت اد ايه الجلاد الشفاف بيلمع و سهل التنضيف

حاولي توفري مساحة بانك تحطي حاجة تزودلك رف يعني مثلا هنا انا حطيت طبق التقديم ده عشان يزودلي رف ف الدرفة غير كدة كمان ممكن لو حطيت اي حاجة قدامه هقدر اشيل الحاجة اللي عليه بدون اي مشكلة و ابقى كدة وفرت لنفسي مساحة قدامه  بصي كدة عشان تفهمي وجهة نظري

شوفي كدة انا اقدر اشيل الحاجات اللي ورا الدرفة - اللبانة -  بسهولة بدون ما اشيل الحلة اللي حطاها قدامه و بمنتهى البساطة

ممكن على فكرة انتي كمان تستخدمي اي حاجة تانية متوفرة عندك مثلا بصي كدة

ده التربو اللي بنحط فيه بصل و توم فكرت بصراحة استخدمه احط حلة تحتيه و حلة فوقيه عشان يعمل مساحة بس بصراحة منفعش طلع كبير اوي لو عندك اي اقتراحات ابعتيلي

يعني لو عندك اي حاجة تنفع ممكن تستغليها بدل ما تتكلفي و تجيبي حاجة غالية صح ؟

و ده الشكل النهائي للحلل في الاخر ايه رايك

خدي بالك طبق التقديم موفرلي مساحة مش باين هنا اوي لان الحلة اللي عليه مش كبيرة لكن لو حطيت عليه حلة كبيرة اكيد هيفرق غير كمان الحلتين اللي على جنب حطيت الحلة و غطاها مقلوب فوقها و عليها حلة و غطاها مقلوب فوقها بالشكل ده هاخد الحلة بغطاها بشكل اسهل و من غير ما اقعد ادور ع الغطا


اتمنى يكون البوست عجبكم و فادكوا .. عايزة اشوف تعليقاتكم و ردودكم ممكن تعلقي بدون ما تدخلي ايميلك اختاري التعليق بدون اسم و علقي... اشوفكو البوست الجاي