ازاي تخلي الحوض بتاع المطبخ نضيف معظم الوقت ؟ اكيد بتفكري ان ده سؤال صعب و اجابته اصعب لان بصراحة غسيل المواعين تعب ف الرجل و الضهر و الاعصاب .. تحسي انه بياخد وقت لبكرة الصبح و السبب اللي بيخلي معظم الستات تكره المواعين هو انها عبارة عن شوية حاجات ملزقة و مزيتة مرصصة فوق بعضها و عاملة كومة مواعين مبتخلصش و كل الستات بتكره الكومة .. كومة المواعين و كومة الغسيل و كومة الورق و المجلات اي حاجة بتعمل كومة الستات بتكره تقوم تعملها .. بصراحة مش الستات بس .. اكيد كل الناس ...المواعين مش بس مقرفة دي كمان في الشتا بتبقى كابوس مرعب لو معندكيش سخان .. سامعة صوت من بعيد بيقول .. حتى لو عندي سخان و حياتك
 |
| المصدر |
المفاجأة بقى اني اتخلصت من المواعين دي للابد .. انا تقريبا الحوض عندي دايما بيلمع و مفهوش مواعين .. طبعا مش قادرة اقولك الراحة النفسية لما اجي املا ازازة مية او الغلاية .. بجد رااااحة ... بس قبل ما اقولك الروتين عاوزة اقولك مميزاته
1 - انك هيبقى عندك حوض نضيف معظم الوقت
2 - هتبدئي تحضري وجبتك سواء فطار او غدا او عشا و كل مواعينك نضيفة و في مكانها
3 - هتصحي الصبح و تنامي بالليل و مفيش حفلة مواعين شغالة ف المطبخ تطبل و تقلق منامك
4 - مش هتقضي وقت الاسرة و لا هتقضي الليل واقفة تغسلي المواعين
5 - مش هتقفي ساعة على رجلك بعد الغدا تغسلي مواعين و بقيت الاسرة برة قاعدة بتاكل كنافة قدام التلفزيون
ها . مستعدة ؟ يلا تعالي اشرحلك خطوات الروتين اللي عملته عشان اتخلص خالص من الهم ده
الحوض لغسل المواعين مش لتخزينهم
اظن واضح المبدأ ده .. بصراحة انا نفسي اخدت وقت شوية على ما استوعب ان الحوض مش لتخزين المواعين بالليل و ان الحوض عشان نغسل المواعين ..انا عارفة اننا بنكسل نغسل المواعين بالليل او بعد الغدا بس لازم تستوعبي كويس انهم مش هيتغسلوا لوحدهم بالليل و ان الحوض مش هيغسلهم لوحده و كمان اوعدك لو مشيتي ع الخطوات بتاعة الروتين دي .. هتبقي فخورة بنفسك كل يوم الصبح و بالليل او اي ضيفة تدخل صدفة تلاقي حوضك بيلمع
سيبي الاطباق اللي بتستخدميها كل يوم بس ف المطبقية
من الاول كدة و قبل كل حاجة عايزين نتفق نحط شوية مواعين صغيرين بس في المطبقية للاستخدام اليومي .. ها ؟ سامعني ؟. شووووووييييية اطبااااق .. لو عندك اطباق كتير في المطبقية هتفضلي كل مرة تستخدمي طبق جديد نضيف و تكوميهم ف الحوض مش انتي و بس لكن ده كل اللي ف البيت هيستسهل و ياخد من الاطباق النضيفة و يكوم ف الحوض لكن لو عندك شوية اطباق بس هتلاقي نفسك مضطرة تغسلي واحد من الحوض لو كلهم مش نضاف
اقعدي كلي ع السفرة و انتي سايبة الحوض نضيف
هو ده بقى سر الروتين اصلا و قلبه .. انك تنضفي المواعين قبل ما تقعدي تاكلي يعني الاكل خلاص بيتغرف و الحوض نضيف
يعني تكوني قاعدة على السفرة و الحوض مفيهوش حاجة خالص .. تخيلي معايا من الاول خالص لو انك صحيتي الصبح و الحوض نضيف و بتعملي الفطار مثلا .. يبقى كل المواعين اللي هتتحط ف الحوض عبارة عن المواعين اللي انتي استخدمتيها و انتي بتحضري الفطار .. نفس الشيء فكل وجبة .. لازم الحوض يكون نضيف قبل ما تروحي تاكليعارفة هتقولولي نعم يا حبيبتي؟ طب و دي ازاي دي هقولك ازاي ف الخطوتين الجيين
طبق واحد في كل مرة
تغسلي طبق ف كل مرة اثناء ما حاجة بتطبخ ع البوتاجاز .. و المكرونة بتتسلق .. و اللحمة بتتحمر و المية بتغلي و اللحمة ببتعصج و البصل بيتحمر و الفرخة بتتسلق .. في ايييييي عملية ممكن تتعمل من غيرك و بتاخد وقت تقدري تستغلي الوقت ده و تغسلي طبق واحد او معلقة او شوكة او كوباية او مغرفة ... كل مرة تغسلي حاجة واحدة بس .. هتلاقي المواعين كلها خلصت قبل ما تخلصي طبيخ .. لان معظم المواعين بتيجي من المواعين اللي استخدمناها اثناء الطبخ
متحطيش كل الاطباق في الحوض
يعني دلوقتي انتي استخدمتي كوباية شربتي فيها مية .. ليه تحطيها وسط المواعين المزيتة في الحوض مش احسن نشطفها و نشيلها على طول .. مثلا طبق غسلتي فيه خضار ولا فاكهة مفش داعي نحطه وسط زحمة الحوض و المواعين و هي مش نضيفة نفس المبدأ على كل الحاجات سكينة قطعتي بيها تفاحة او قسمتي بيها رغيف ليه يتحطوا ف الحوض اشطفيهم و حطيهم مكانهم متجبيش لروحك وجع الضهر
بعد الوجبات
خلاص ؟ اتفقنا اننا هناكل و احنا سايبين الحوض ورانا فلة ؟؟ يبقى احنا قاعدين بناكل و احنا مرتاحين ان مفيش حاجة هنغسلها غير الطبقين اللي بناكل فيهم دلوقتي... طيب بعد الاكل هنعمل ايه ؟؟؟ بعد الاكل هنلم كل المواعين الفاضية في صنية كبيرة و نجري ع الحوض او نلم طبقين نغسلهم على ما حد يساعدك و يجبلك بقيت الاطباق و كل ما يجيلك طبقين اغسليهم .. صدقيني مش هياخدو اكتر من دقايق
بالنسبة للحلل
لو الحلة فضيت بعد ما غرفتي منها تتغسل قبل الاكل ... لو هي فيها حاجات لازقة زي الرز مثلا يا اما هنحضر مية في الغلاية و نصب فيها مية سخنة او نملاها من الحنفية مية و في الحالتين هنسيب الحلة فوق اخر عين بوتاجاز طفيناها لانها بتكون لسة سخنة .. ببساطة احنا مش هنستخدم الحلل الفاضية بعد الاكل تاني .. هنحفظ كل بواقي الاكل في علب ف التلاجة .. ولو الحلة لسة فيها بعد ما غرفتي سيبيها و هنحط فيها البواقي و نغلي البواقي و بعدها يا اما نسيبها ع البوتاجاز لتاني يوم تتاكل على طول او تتحط البواقي بعد الغليان في علبة و تتحط في التلاجة طبعا بعد ما تبرد
بعد الوجبات الخفيفة بين الوجبات
عملتي مثلا طبق فيشار ولا سلطة فواكه .. بعد ما تخلصوا انا متاكدة انك مش هتقدري تمسكي نفسك انك تغسلي الطبق لان الحوض اوريدي فاضي .. يعني مفيش ست عاقلة هتقدر تحط طبق واحد مش نضيف في حوض نضيف لازم هتستغل الفرصة و تغسله اول باول كدة انا بصراحة مستنية اشوف ردود افعالكو في الحكاية دي .. لما بيكون الحوض نضيف و في ف ايدك طبق واحد بس مش نضيف هتسيبيه جوة و لا لأ
قبل ما تنامي
حاسة طبعا انك هتفضلي تغسلي مواعين طول الوقت ؟؟ لا طبعا انا بتحداكي بجد لو مشيتي ع الخطوات دي المواعين مش هتاخد منك اكتر من دقايق معدودة .. طبعا بعد العشا احنا حافظين هنعمل ايه المواعين مغسولة قبل ما ناكل و بعد العشا المواعين كلها اتغسلت ... قبل ما تنامي بقى .. المواعين كلها اكيد هتكون نشفت .. عاوزاكي بس ف خمس دقايق تحطي المواعين و الحاجات في اماكنها هتصحي الصبح المطبخ كإنه لسة جديد المواعين مغسولة و كل حاجة في مكانها عايزة اعرف احساسك وقتها اكيد هتكوني فخورة بنفسك مفيش احلى من كدة احساس و مفيش اصعب من احساس انك تصحي من النوم و الحوض مكوم هتبقي مش عايزة تقومي من ع السرير اصلا
انا نفسي مواعيني كانت كتير جدا جدا و كنت بكره ادخل المظبخ و الله العظيم كانت عندي المواعين فوق بعضها على طول باستمرار لدرجة اني فكرت كتير اجيب غسالة اطباق تخيلوا بقى ؟ و فعلا نزلت ادور على غسالات الاطباق و فضلت ادور ع النت على احسن غسالة و كان بيني و بين شراها خطوات بسيطة لكن بعد الروتين ده و الله ارتحت جدااااااااااا و ماشية بيه بقالي اكتر من ست شهور بشكل يومي و جايب نتيجة مذهلة لحد دلوقتي.
اتمنى يكون البوست كان حلو المرة دي و اتمنى اني اكون فدتكوا ولو بحاجة بسيطة .. مستنية اشوف ردودكو و ردود افعالكو و تعليقاتكوت .. الصور و الفيديوهات ... مستنياكوا ..على فكرة ممكن تعلقي من غير ما تسجلي دخول ولا حاجة اختاري التعليق بدون اسم و علقي اشوفكوا البوست الجاي
ليست هناك تعليقات:
إرسال تعليق