2014/06/11

شغل دماغك : منظم للحمام ببلاش و من غير وقت

واحد من الافكار الرائعة اللي عملتها في البيت هو المنظم الجامد بتاع الحمام ده .. اخدت فكرته من صورة ع النت من مجلة اسمها Real Simple  لو تعرفوها فيها افكار حلوة بس يا خسارة معظمها بيعتمد على منتجات او على انك تدقي ف الحيطة و تركبي رفوف و كدة .. انا معنديش الاوبشن ده طبعا لاني زي ما قلت قبل كدة البيت ايجار مقدرش اقعد كل شوية احفر و ادق مسامير و اعمل حفر في الحيطان بس لقيت الفكرة دي 



شغل دماغك : منظم للحمام ببلاش و من غير وقت


هههههههههههه طبعا اكيد .. احنا في المطبخ .. التربو ده كلكوا اكيد عارفينه بيتباع ف كل حتة ... عندي منه ف المطبخ بحط فيه البصل و البطاطس فضلت افكر كتير و قليل ايه تاني ممكن احطه في التربو ده غير البصل و البطاطس ؟؟؟ معرفتش الاجابة بس لو تلاحظوا انا خلعت اخر سلة .. مكنتش اعرف انه سلاته شكلها رائع و حلو اوي كدة طبعا متخيلين انا ممكن اكون حطيتها فين



شغل دماغك : منظم للحمام ببلاش و من غير وقت


صح برافو عليكي ف الحمام .. حطيتها في الحمام و حطيت فيها كل الشامبوهات و البلسمات و الشاور جيلا ت و الكريمات و الاسكربات  و الذي منه بجد شكله حلو جدا .. كل اللي عملته اني ربطته بحبل طخين من عندي ف عليقة كانت متعلقة ف الحمام من الاول لمت الدنيا .. مش محتاجة اكتر من كدة .. بجد فكرة ملهاش حل .. ساعات  و الله بنبسطت بعقلي .. بس بقى لا اتغر .. المهم اني مكنتش واخدة بالي ان كل منتجاتنا ف الحمام صفرا هههههه بس شكلها طلع شيك و الله و من غير فلوس خالص .. ها ايه رايكوا بقى ؟؟


اتمنى ان يكون البوست النهاردة عجبكوا عاوزة اقولكوا بس لما تشوفوا فكرة ع النت ممكن تطبقوها بمنتهى البساطة و ممكن توحيلكوا بافكار جميلة متتخيلوش انها تطلع منكوا بس الواحد يشغل عقله .. متمرش عليكوا الفكرة مرور الكرام و مش لازم تكون نفس الفكرة بالضبط عشان تطبقوها .. يعني ممكن يكون عندكو حاجة شبهها .. مستنية تفاعلكوا و ردودكوا و تعليقاتكوا ممكن تعلقي بدون ما تسجلي اي دخول اختاري بدون اسم و علقي مستنياكوا .. اشوفكوا البوست الجي

ليست هناك تعليقات:

إرسال تعليق

عدد الزيارات