2014/06/12

ترتيب ادوات البيبي بالصور

انا متحمسة جدا اني اشارك معاكو الشفنيرة بتاعة ابني جدا و اتمنى انكو تحبوها زي مانا بحبها الشفنيرة دي بس لتشيرتاته الداخلية و بناطيله الداخلية و ادواته اللي بيستخدمها و الادوية بتاعته .. انا رتبت الشفنيرة بتاعته من غير ولا مليم تخيلوا؟؟


اول حاجة هوريكو الشفنيرة من قدام ... كالعادة اللي عارفني بحب اكتب طوابع على كل حاجة بس بصراحة دي اكتر طوابع كيوت عملتها لحد دلوقتي 


ترتيب ادوات البيبي بالصور

زي ماهو باين كدة الدرج الاولاني فيه الدوا بتاعه و ادواته اللي بيستخدمها و تاني درج للغيارات .. التيشرتات بكم و من غير كم و بنطلونات و الدرج اللي بعده للشرابات و الاحذية و اخر درج للالعاب 

يلا ناخد الجولة بتاعتنا 


ترتيب ادوات البيبي بالصور

اول حاجة عملتها هي اني عملتله مقسم ادراج زي ادراجنا :) :) كرتون و مسدس شمع و ورق تغليف حللي المشكلة .. هو شكله مش حلو اوي يعني بس بصراحة عملي و مرتب 


ترتيب ادوات البيبي بالصور

اول درج مش حلو اوي زي الادراج اللي بتشوفوها ع النت بس كل حاجة مرتبة و متقسمة فيه زي ما قلنا الادوية و البيبي اويل و البيبي لوشن و المراهم بتاعته و كنت كتبت كمان ع الادوية من فوق عشان اشوفها اول ما افتح الدرج او اي حد غيري يفتح الدرج و المشط بتاعه و القصافة عارفين محطوطين جوة ايه ؟ جوة غطا علبة شوكولاتة جلاكسي هقولكوا العلبة نفسها فين بس انا استفدت من الغطا عشانه غويط و لامم الحاجة و لو فتحت الدرج مش هيقعوا 



تاني درج فيه غياراته التيشرتات التحتنية اللي بكم و اللي بنص كم ع اليمين و البناطيل قدام و السليبات مطبقين جوة علبة الشوكولاتة الجلاكسي



تالت درج فيه البفتات مترتبة حسب اللون بشكل عامودي و الجزم و الصنادل و الجلوفز بتاعته و السكارف ابو ارنب الاصفر ده و الشرابات و الطواقي 


ترتيب ادوات البيبي بالصور

دي كانت الشفنيرة الصغننه بتاعة ابني لو عايزة تعرفي طبقت الحاجات دي ازاي ادخلي هنا. او اعملي كومينت تحت ممكن تعملي كومنت بدون ما تسجلي اي دخول اختاري بدون اسم و علقي مستنياكو و مستنية ردودكوا و تطبيقاتكوا .. اشوفكوا البوست الجاي

ليست هناك تعليقات:

إرسال تعليق

عدد الزيارات