معظم الازواج بيحبوا يفضوا جيوبهم اول ما يدخلوا البيت و يحطوا المفاتيح و الموبايل و الساعة و المناديل و الفواتير و كله كله على اول تربيزة يلاقوها قدامهم .. اللي هي ببساطة شديدة في وش المدخل
بمجهود بسيط اقل من بسيط كمان ممكن تساعدي زوجك ابنك باباكي او اخوكي و تساعدي نفسك تكونوا منظمين بسهولة و فورا من غير وقت و لا مجهود و ببلاش كمان
ده شكل التربيزة اللي ف المدخل قبل ما ارتب اي حاجة .. موبايل و مفاتيح و شوية فكة و كلام كتير كدة
اول خطوة للفكة عملتلها حافظة .. عارفين البتاعة اللي بنحط فيها الفكة ؟ كلكوا عارفينها طبعا اهي
شكلها بصراحة يقطع القلب .. غلبانة و طلعان عينها قلت اغلفها بورق تغليف كان عندي و ده بقى شكلها
انا زوجي مبيحبش الحاجة تبقى مترتبة اوفر اوي اوي زي الشكل اللي تحت ده .. كل حاجة ليها في مكان بصراحة الواحد بيكون راجع من برة ملوش اي عقل و لا مزاج و لا مخ يقعد يقرا و يحط كل حاجة في مكان متقسم و مكتوب عليه
الفكرة ابسط مما تتخيلوا كان عندي الطبق ده كانت مدياهولي والدة زوجي بجد شكله شيك .. لملي الموضوع في اقل من ثواني معدودة .. بدون وقت و لا مجهود لميت كل حاجة في الطبق و عملت ظرف صغير للفواتير اللي بتيجي من برة طبعا الفواتير دي ليها نظام هقولهولكوا بعدين في بوست مختلف
اتمنى اكون افدتكوا بحاجة ولو بسيطة .. عاوزة اشوف ردود و كومنتات .. مش سامعة حاجة يعني .. يلا فين التفاعل .. ممكن على فكرة تعلقي بدون ما تسجلي اي اسم او ايميل اختاري بدون اسم و علقي كل ما هشوف كومنتات اكتر هكتب اكتر يلا اشوفوا البوست الجاي
ليست هناك تعليقات:
إرسال تعليق